🚨 “अन्तुर्ली ते मंत्रालय… शिक्षक भरतीच्या कथित रॅकेटचा मागोवा!” भाग – १ : शाळा हलवण्यामागे नेमके काय? ‘पंकज’ कोण?

भाग – १ : शाळा हलवण्यामागे नेमके काय? ‘पंकज’ कोण?

संपादक महेंद्र सोनवणे

भडगाव | जळगाव जिल्ह्यातील भडगाव तालुक्यातील अन्तुर्ली येथील एका शिक्षण संस्थेबाबत गंभीर आरोप समोर येत असून, या प्रकरणाची सखोल चौकशी करण्याची मागणी स्थानिक नागरिक व पालकांकडून होत आहे.

मिळालेल्या माहितीनुसार, अन्तुर्ली येथील माध्यमिक शाळा बंद करून दुसऱ्या ठिकाणी स्थलांतरित करण्यात आल्याचा दावा केला जात आहे. या निर्णयामागे नेमके कारण काय, याबाबत विविध चर्चा सुरू असून, काही जणांकडून शिक्षक भरतीतील कथित गैरप्रकार लपवण्यासाठी हा निर्णय घेतल्याचा आरोप केला जात आहे. मात्र, या दाव्यांची अधिकृत पुष्टी झालेली नाही.

याच संस्थेच्या अखत्यारीत अनेक शैक्षणिक संस्था कार्यरत असल्याचे सांगितले जात असून, त्यांचे व्यवहार ‘पंकज’ नावाची व्यक्ती पाहत असल्याची चर्चा परिसरात आहे. या व्यक्तीची नेमकी भूमिका काय, याबाबतही प्रश्न उपस्थित केले जात आहेत.

काही सामाजिक कार्यकर्ते आणि पालकांनी शिक्षक भरती, बदल्या, शैक्षणिक कागदपत्रे आणि आर्थिक व्यवहारांची स्वतंत्र चौकशी करण्याची मागणी केली आहे. संबंधित सर्व व्यवहारांची चौकशी स्वतंत्र यंत्रणेमार्फत व्हावी, अशीही मागणी होत आहे.

दरम्यान, या सर्व आरोपांबाबत संबंधित संस्था किंवा संबंधित व्यक्तींची अधिकृत भूमिका अद्याप समोर आलेली नाही. त्यांचे म्हणणे उपलब्ध झाल्यास तेही प्रसिद्ध करण्यात येईल.

क्रमशः…

पुढील भागात : “पंकज” कोण? त्याची नेमकी भूमिका काय? चर्चेतील दाव्यांमागील तथ्यांचा शोध.