पुणे :- राज्यामध्ये आचारसंहिता लागू असल्याने ठिकठिकाणी नाकेबंदी असून लहान मोठ्या वाहनांची तपासणी केली जात असतानाच पुण्यामध्ये पोलिसांच्या हाती मोठं घबाड लागलं आहे.
पुण्यातील सहकार नगर पोलीस स्टेशनच्या हद्दीत पोलिसांना नाकाबंदीदरम्यानत तब्बल 138 कोटींचं सोनं सापडलं आहे. आज सकाळी केलेल्या कारवाई एवढ्या मोठ्या प्रमाणात सोनं जपत् करण्यात आलं आहे.
घडलं काय?
पुण्यातील सहकार नगर येथे पोलिसांनी एमएच 02 ईआर 8112 या कंटेनरला तपासणीसाठी थांबवलं. तपासणीदरम्यान या पांढऱ्या रंगाच्या कंटेनरमध्ये मोठ्या प्रमाणात सोनं असल्याचं पोलिसांच्या लक्षात आलं. या कंटेनरमधील सोन्याची एकूण किंमत 138 कोटी रुपये इतकी असल्याची माहिती समोर आली आहे. नियमित नाकाबंदीदरम्यान सदर सोन्याचा कंटेनर थांबवून तपासणी करण्यात आली. तपासणीदरम्यान पोलिसांनी या सोन्याच्या वाहतुकीचा परवाना मागितला असता चालकाकडे आणि त्याच्यासोबत असलेल्या व्यक्तीकडे रितसर कागदपत्रं होती. हे एवढं सोन डिलिव्हरी ट्रान्सपोर्टचे होते अशी माहिती पोलीस तपासामध्ये समोर आली आहे. या सोन्याच्या वाहतुकीचा कायदेशीर परवाना संबंधित वाहन चालकाकडे असल्याचं स्पष्ट झाल्याने पोलिसांनी कोणतीही कारवाई केली नाही.
हिंगोलीत सापडली कॅश
हिंगोलीत नाकाबंदीदरम्यान एक कोटी रुपयांची रक्कम स्थानिक गुन्हे शाखेने जप्त केली आहे. विधानसभा निवडणूक अनुषंगाने हिंगोलीत जिल्ह्यात ठिकठिकाणी नाकाबंदी करण्यात आली असून चेक पोस्टवर वाहनांची तपासणी केली जात आहे. दरम्यान 2 कारची तपासणी केली असता एका कारमध्ये एक कोटी 23 लाख रुपये सापडले तर दुसऱ्या कारमध्ये 13 लाख 50 हजार रुपयांची रक्कम हस्तगत करण्यात आली. नेमकी ही रक्कम कोणाची आहे कशासाठी आणि कुठे जात होती. याबाबत पोलीस तपास करत आहेत.
