जळगाव – : तालुक्यातील कानळदा येथे काही वर्षापूर्वी अंगणवाडीचे बांधकाम झाले होते. आंगणवाडीची गेल्या काही महिन्यापासून दुरवस्था झाली असून, याबाबत पालकांनी वारंवार देऊनही प्रशासनाचे दुर्लक्ष होत आहे. यात तेथे शिकणार्‍या चिमुकल्यांचे मात्र हाल होताना दिसत आहेत. विशेष म्हणजे या अंगणवाडीतच पोषण आहार शिजविण्यासाठी गॅस शेगडी लावली जात असल्याने दुर्घटनेची शक्यता पालकांकडून व्यक्त केली जात आहे.
ही इमारत कहि वर्ष जुनी असून, इमारतीचे बांधकाम अतिशय नित्कृष्ठ झाले आहे. या आंगणवाडीमध्ये गावातील 3 ते 5 वर्षे वयोगटातील बालके पूर्व प्राथमिक शिक्षण घेत आहेत. याशिवाय 6 महिने ते 3 वर्षे वयोगटातील बालकांचीही या केंद्रामार्फत नियमित देखरेख केली जाते. परंतु या इमारतीच्या दुरुस्तीकडे दुर्लक्ष झाल्याने अपघाताची टांगती तलवार तेथील सर्वांवर आहे.
विशेष म्हणजे मुख्य दरवाजाबाहेरच मोठ्या प्रमाणात घाणीचे साम्राज्य असल्याने बालकांच्या आरोग्याचा प्रश्न निर्माण झालेला आहे.खेदाची बाब म्हणजे मुलांचा पोषण आहार शिजविण्यासाठी अन्य जागा नसल्याने आंगणवाडीतच खिचडी शिजवली जाते. मुलांना खेळण्याच्या मोकळ्या जागेअभावी स्वयंपाकाच्या ठिकाणीच गॅस सिलंडर जवळ चिमुकली मुले खेळताना दिसतात. अशीच स्थिती तालुक्यातील इतर अंगणवाडी केंद्रांचीही आहे. काही ठिकाणी तर इमारती अभावी मुलांना अन्य ठिकाणी बसविल्याचे निदर्शनास येते. नवीन बांधण्यात आलेल्या इमारतीत पोषण आहार शिजविण्याची व्यवस्था आहे. तरी 10-15 वर्षे जुन्या इमारतीत पोषण आहार शिजविण्याकरिता स्वतंत्र जागा नाही. एकतर वर्गातच आहार शिजविला जातो किंवा सेविका आपल्या घरून तो शिजवून आणतात.
या संदर्भात येथील अंगणवाडी सेविका यांचेकडे पालकांनी बऱ्याच वेळेस तक्रारी दिल्या आहेत कि पोषण आहार शिजविण्यासाठी वरिष्ठ कार्यालयाकडे वेगळ्या जागेची मागणी करावी. त्याच प्रमाणे इमारतीची दुरुस्ती तातडीने करावी. शासन अंगणवाडी केंद्रांसाठी स्मार्ट उपाययोजना राबवित असले तरी मूलभूत सुविधांपासून मात्र बालकांना वंचित ठेवले जात आहे.
तरी लवकरात लवकर आंगणावाडीची दुरुस्ती तसेच मुलांना पोषण आहार घेण्यासाठी स्वच्छ जागा उपलब्ध करावी अशी येथील पालकांनकडून मागणी केली जात आहे
