राष्ट्रवादी काँग्रेसचे आमदार जयंत पाटील यांनी मिंधे सरकार मधील मंत्री गुलाबराव पाटील आणि गिरीश महाजन यांच्यावर गंभीर टीका केली आहे. ज्या सी. आर. पाटील यांनी भाजपला गुजरात निवडणूक जिंकून दिली. त्याच सी. आर. पाटलांच्या मुलीच्या पॅनेलचा पराभव करण्यासाठी गुलाबराव पाटील आणि गिरीश महाजन यांनी कंबर कसली अशी खोचक टीका जयंत पाटील यांनी केली आहे.
जळगाव जिल्ह्यातील सी. आर. पाटील यांच्या कन्येचे पॅनेल ग्रामपंचायत निवडणुक लढवत होते. मात्र त्यांच्या पॅनेलचा पराभव करण्यासाठी गुलाबराव पाटील आणि गिरीश महाजन यांनी प्रयत्न केला असल्याची टीका जयंत पाटील यांनी केली. सी. आर. पाटील यांनी गुजरात निवडणुकीत फार महत्वाची भूमिका पार पाडली होती. मात्र त्याच सी. आर. पाटील यांच्या ग्राम विकास पॅनलला या निवडणुकीत पराभव स्वीकारावा लागला आहे. भाविनी पाटील यांच्या ग्रामविकास पॅनलला 10 पैकी 3 जागा मिळाल्या असून त्यांचे प्रतिस्पर्धी शरद पाटील यांच्या लोकशाही उन्नती पॅनलला 10 पैकी 7 जागा मिळाल्या आहेत.
येत्या सहा महिन्याच्या आत तुम्ही घरी नाही गेला तर त्यांचे नाव सी. आर. पाटील नाही असा इशाराही जयंत पाटील यांनी या दोन्ही मंत्र्यांना दिला आहे. सी. आर. पाटील आता तुमचा करेक्ट कार्यक्रम करणार असे पाटील यांनी यावेळी सांगितले.
