जळगाव -: मोबाईलवर रील बनवण्याच्या नादात धावत्या रेल्वेसमोर स्टंट करणे दोन शाळकरी मित्रांना चांगलेच महागात पडले. रविवारी (दि. २५ ऑक्टोबर) सकाळी ११ वाजेच्या सुमारास पाळधी चांदसर रेल्वे गेटजवळ अहमदाबाद-हावडा एक्स्प्रेसच्या धडकेत दोन १८ वर्षीय मित्रांचा जागीच मृत्यू झाला. या धक्कादायक घटनेने पाळधी परिसरात शोककळा पसरली आहे.
मयत तरुणांची नावे प्रशांत पवन खैरनार आणि हर्षवर्धन महेंद्र नन्नवरे (दोघेही वय १८, रा. महात्मा फुले नगर, पाळधी) अशी आहेत. दोघेही मैत्रीपूर्ण आणि मनमिळाऊ स्वभावासाठी परिचित होते. रविवारच्या सुट्टीदिवशी हे दोघे पाळधी चांदसर रेल्वे गेटजवळील रेल्वे ट्रॅकवर आले होते. सोशल मीडियासाठी आकर्षक आणि साहसी रील बनवण्याच्या प्रयत्नात ते धावत्या रेल्वेसमोर धोकादायक पद्धतीने व्हिडिओ शूट करत होते. याचवेळी धरणगावकडून जळगावकडे जाणाऱ्या अहमदाबाद-हावडा एक्स्प्रेसने त्यांना जोरदार धडक दिली. रेल्वेचा प्रचंड वेग आणि अपघाताची तीव्रता यामुळे दोघांना वाचण्याची संधीच मिळाली नाही.
घटनेची माहिती मिळताच पाळधी पोलीस घटनास्थळी दाखल झाले आणि पंचनाम्याची कार्यवाही सुरू केली. मृतदेह शवविच्छेदनासाठी पाठवण्यात आले. या दुर्घटनेमुळे दोन्ही कुटुंबांवर मोठा आघात झाला असून, गावात हळहळ व्यक्त होत आहे. सोशल मीडियावर प्रसिद्धी मिळवण्यासाठी तरुणांमध्ये वाढत चाललेली धोकादायक रील बनवण्याची प्रवृत्ती चिंताजनक बनली आहे. या घटनेने समाजात जागरूकता निर्माण करण्याची गरज अधोरेखित झाली आहे.
