🟥 हवामान अंदाज : राज्यात मुसळधार पावसाचा इशारा; ३१ जुलै ते ८ ऑगस्टपर्यंत पावसाचा जोर वाढणार

प्रतिनिधी | जळगाव संदेश

बंगालच्या उपसागरात निर्माण झालेल्या कमी दाबाच्या पट्ट्यामुळे तसेच बाष्पयुक्त वाऱ्यांच्या प्रभावामुळे महाराष्ट्रात पुन्हा एकदा पावसाचा जोर वाढण्याची शक्यता व्यक्त करण्यात आली आहे. हवामान अभ्यासकांच्या अंदाजानुसार ३१ जुलै रोजी उत्तर महाराष्ट्र, खानदेश आणि मराठवाड्यात काही ठिकाणी मुसळधार ते अतिवृष्टीसदृश पावसाची शक्यता आहे.

उत्तर महाराष्ट्रातील धुळे, नंदुरबार, जळगाव, नाशिक तसेच शहादा परिसरात जोरदार पावसाचा इशारा देण्यात आला आहे. तर मराठवाड्यातील छत्रपती संभाजीनगर (कन्नड, सिल्लोड, सोयगाव, वैजापूर), जालना जिल्ह्यातील भोकरदन, जाफराबाद आणि बुलढाणा जिल्ह्यातही पावसाचा जोर वाढण्याचा अंदाज आहे. पश्चिम महाराष्ट्रातील पुणे, इंदापूर, सांगली आणि सोलापूर परिसरातही पावसाच्या सरी कायम राहण्याची शक्यता वर्तविण्यात आली आहे.

दरम्यान, १ आणि २ ऑगस्ट रोजी काही भागात ढगाळ वातावरण, हलका पाऊस आणि वाऱ्याचा वेग कायम राहील. काही ठिकाणी दुपारनंतर तात्पुरती उघडीप मिळू शकते, मात्र ती पूर्णपणे कोरडी राहणार नसल्याचे सांगण्यात आले आहे.

३ ऑगस्टपासून राज्यात पावसाचा दुसरा टप्पा सुरू होणार असून विदर्भ, मराठवाडा आणि उर्वरित महाराष्ट्रात पुन्हा पावसाचा जोर वाढेल. ५ ते ८ ऑगस्टदरम्यान राज्यातील ९० ते १०० टक्के भागात चांगल्या पावसाची शक्यता असून, त्यामुळे विहिरींच्या पाणीपातळीतही वाढ होण्याची अपेक्षा व्यक्त करण्यात आली आहे.

शेतकऱ्यांना महत्त्वाचा सल्ला

शेतकऱ्यांनी खत व्यवस्थापन, फवारणी व इतर शेतीकामांचे नियोजन हवामानाचा अंदाज लक्षात घेऊन करावे. तसेच नदीकाठच्या आणि गोदाकाठच्या परिसरातील नागरिकांनी वाढत्या पाण्याच्या प्रवाहामुळे सतर्क राहण्याचे आवाहन करण्यात आले आहे.

– जळगाव संदेश