नवी दिल्ली -: २६/११ च्या मुंबई हल्ल्याचा सूत्रधार तहव्वूर राणाला राष्ट्रीय तपास संस्थेने (एनआयए) गुरुवारी ताब्यात घेतले. राणाचे प्रत्यार्पण करुन भारतात आणले त्यानंतर लगेच एनआयएने दिल्लीच्या पालम विमानतळावरूनच ताब्यात घेतले.
त्याला दिल्लीच्या तिहार तुरुंगात विशेष सुरक्षा व्यवस्थेत ठेवण्यात आले आहे. अमेरिकेतून राणाचे भारतात प्रत्यार्पण हा आपल्या देशासाठी मोठा विजय समजला जात आहे. राणावर एनआयएच्या विशेष न्यायालयात खटला चालणार आहे. यासाठी सरकारी वकील म्हणून नरेंद्र मान यांना केंद्रीय गृहमंत्रालयाने नियुक्त केले आहे. तर पियूष सचदेवा राणाचे वकील आहेत. राणाला फाशीची शिक्षा झाली पाहिजे, अशी मागणी देशभरातून केली जात आहे. नेमकी काय शिक्षा होणार याचा निर्णय आता न्यायालय घेईल.
दहशतवादी तहव्वूर राणाला गल्फस्ट्रीम जी ५५० विमानाने अमेरिकेतून भारतात आणण्यात आले. सायंकाळी साडेसहाच्या सुमारास भारतीय अधिकारी दिल्लीच्या पालम विमानतळावर राणाला घेऊन उतरले. त्यानंतर लगेच त्याला एनआयएने ताब्यात घेतले. विमानतळावर राणाची वैद्यकीय तपासणी करण्यात आली. वैद्यकीय तपासणीनंतर विशेष सुरक्षेत त्याला पटियाला हाऊस न्यायालयात हजर करण्यात आले. न्यायाधीश चंद्रजित सिंह यांच्यासमोर राणाला हजर करण्यात आले. न्यायालयाने राणाला एनआयएच्या कोठडीत दिले आहे. एनआयएचे पथकाने त्याची कसून चौकशी केल्याचे सूत्रांनी सांगितले.
पीयूष सचदेवा राणाचे वकील
तहव्वुर राणाचे प्रतिनिधीत्व वकील पीयूष सचदेवा करतील. दिल्ली राज्य कायदेशीर सेवा प्राधिकरणाने वकील पियुष सचदेवा यांची राणाचा वकील म्हणून नियुक्ती केली आहे. सुरक्षेच्या कारणास्तव पीयूष सचदेवा यांनी आपले फोटो प्रसारित करू नयेत अशी विनंती केली आहे.तिहार तुरुंगात कडक सुरक्षा व्यवस्था
तिहार तुरुंगात तहव्वूर राणाला कडक सुरक्षा व्यवस्थेत ठेवण्यात येणार असल्याचे सूत्रांनी सांगितले. यासाठी त्रि-स्तरीय सुरक्षा व्यवस्था करण्यात आली आहे. स्वॅट, दिल्ली पोलिस आणि सीआरपीएफचे विशेष पथक त्याच्या सुरक्षेसाठी तैनात केले जाईल. राणाच्या कक्षामध्ये केवळ १२ अधिकाऱ्यांनाच प्रवेश असेल, असेही समजते.
