साकळी ता.यावल (वार्ताहर) आज दि.४ रोजी दुपारच्या वेळी झालेल्या जोरदार वादळामुळे साकळीसह परिसरातील गावांना वादळाचा मोठा तडाखा बसलेला असून जवळपास अर्धा ते पाऊण तास जोरदार वारा व वादळाने भयानक थैमान घातले होते.या वादळामुळे साकळीसह परिसरातील अनेक हेक्टर शेतामधील केळीबागा
जमीनदोस्त झाल्या असून शेतकऱ्यांचे मोठे नुकसान झालेले आहे.वादळाचा वेग एवढा मोठा होता की,मोठ-मोठी झाडे अक्षरशः गिरक्या घेत होती.या वादळामुळे शेतकरी धास्तावला आहे.वादळानंतर परिसरात हलक्या पावसाच्या सरी आल्या.
या बाबत सविस्तर असे की,आज दि.४ रोजी अकरा वाजेपर्यंत चांगलेच उन्ह तापत होते.त्यानंतर वातावरणात अचानक बदल झाला व दुपारी सुमारे पाऊणेबारा वाजेपासून जोरदार वादळीवारा सुटला. सुसाट्याच्या वाऱ्यामुळे मुळे धुळीचे लोट आकाशात उडू लागले होते. त्यानंतर काही क्षणातच वाऱ्याचा वेग वाढून वादळास सुरुवात झाली.जवळपास अर्धा ते पाऊण तास चाललेल्या वादळाने साकळी, शिरसाड,मनवेल,
थोरगव्हण, शिरागड, पिळोदा,नावरे,चुंचाळे,बोराळे सह परिसरातील गावांना मोठा तडाखा दिलेला आहे. या अचानक झालेल्या वादळामुळे अनेकांच्या घरावरची तसेच गुराढोरांच्या गोठ्यांवरील पत्रे उडाली तर साकळी येथे मुजूमदार कॉलनीत एका घरावर झाडाची फांदी पडली मात्र घरातील व्यक्ती शेतात गेले असल्यामुळे मोठा अनर्थ टळला तर भवानी पेठ भागातील प्रकाश सोनार यांच्या घरावर झाडांची मोठी फांदी पडली.तसेच काही ठिकाणी रस्त्यांवर झाडे उन्मळून पडली व झाडाच्या फांद्याही तुटून पडल्या. वादळामुळे काही ठिकाणी विजेच्या तारा तुटल्या व अनेक ठिकाणी मुख्य विजवाहीनीला हानी झाल्यामुळे बराच वेळ वीज गेलेली होती.वादळाचा सर्वात मोठा फटका केळी बागांना बसला आहे.साकळीसह परिसरातील अनेक गावांतील शेतांमधील केळीबाग उन्मळून जमीनदोस्त झाल्या. तर काही भागात तर केळी बागांचे मळेच्या-मळे अगदी संपुर्ण उध्वस्त झालेले असून कोट्यावधी रुपयांचे शेतकऱ्यांचे नुकसान झालेले आहे. वादळाची एवढी भयानक स्थिती होती की,शेतातून घरी येणाऱ्या शेतकऱ्यांना व मजुरांना चालतांना रस्ता दिसत नव्हता.आज रविवार रोजी साकळी येथील आठवडे बाजार वादळामुळे बाजातील लोकांची एकच तारांबळ उडाली होती. साकळीसह संपूर्ण परिसरातील नुकसानग्रस्त केळीच्या बागांचे संबंधित प्रशासनाच्या वतीने तात्काळ पंचनामे करण्यात यावे व नुकसानग्रस्त शेतकऱ्यांना नुकसान भरपाई मिळवून देण्यासाठी आमदार,खासदार या लोकप्रतिनिधींनी शासनाकडे पाठपुरावा करावा अशी मागणी नुकसानग्रस्त शेतकऱ्यांकडून केली जात आहे.
