मुंबई – महाराष्ट्राचे माजी मुख्यमंत्री अशोक चव्हाण यांनी आज, मंगळवारी भारतीय जनता पक्षात (भाजपा) जाहीर प्रवेश केला. चव्हाण यांनी सोमवारी आमदारकी आणि काँग्रेसच्या सदस्यत्वाचा राजीनामा दिला होता.
उपमुख्यमंत्री देवेंद्र फडणवीस आणि प्रदेशाध्यक्ष चंद्रशेखर बावनकुळे यांनी चव्हाण यांचे पक्षात स्वागत केले. याप्रसंगी हर्षवर्धन पाटील आणि भाजपचे इतर प्रमुख नेते उपस्थित होते.
यावेळी देवेंद्र फडणवीस यांनी अशोक चव्हाण यांच्या राजकीय कारकिर्दीवर प्रकाश टाकत त्यांचे पक्षात औपचारिक स्वागत केले. तसेच त्यांच्याकडे कुठली जबाबदारी किंवा पद असेल याबाबत भाजपचे केंद्रीय नेतृत्त्व निर्णय घेईल असे सांगितले. तर भाजप प्रवेशानंतर अशोक चव्हाण म्हणाले की, मी इतकी वर्षे काँग्रेससाठी काम केले. मी माझ्या 38 वर्षांच्या राजकीय प्रवासाची दिशा बदलतोय. मी आज भाजपात प्रवेश केला आहे. पंतप्रधान नरेंद्र मोदींच्या नेतृत्वाखाली आणि त्यांच्याकडूनच प्रेरणा घेऊन या देशात आणि राज्यात चांगले काम करता आले पाहिजे, सकारात्मक भूमिका घेऊन पुढील वाटचाल करता आली पाहिजे, राज्याच्या आणि देशाच्या प्रगतीत आपले योगदान असले पाहिजे, अशी माझी भावना आहे. याच प्रामाणिक भूमिकेतून मी आज भाजपात प्रवेश करत असल्याचे सांगितले. नेहमीच सकारात्मक दृष्टीकोन ठेवून राजकीय आणि सामाजिक क्षेत्रात काम केले आहे. मी मुख्यमंत्री असताना देवेंद्र फडणवीस विरोधात होते. तेव्हापासून आम्हाला एकमेकांच्या कामांचा अनुभव आहे. त्या काळातही आम्ही एकमेकांना साथ दिली आहे. काही सहकाऱ्यांच्या तक्रारी होत्या, त्या तक्रारी मी मान्य करेन. मी नेहमीच आमच्या जिल्ह्याला, मतदारसंघाला न्याय देण्याचा प्रयत्न केला आहे. देवेंद्र फडणवीसही त्यासाठी सकारात्मक होते असे चव्हाण म्हणाले.
भाजपा प्रवेशावरून टीका करणाऱ्यांना उत्तर देताना चव्हाण म्हणाले की, राजकारण हे सेवेचे माध्यम आहे. मला कोणावरही व्यक्तीगत टिकाटिप्पणी करायची नाही. पक्ष सोडल्यावर अनेक सहकारी विरोधात बोलतात, टिकाटिप्पणी करतात, तर काहीजण समर्थन करत आहेत. लोकांमध्ये मतभिन्नता असू शकते. परंतु, व्यक्तीगत स्वरुपाचे दोषारोप मी कधी कोणावर केले नाहीत. आताही मी तसे काही करणार नाही. आजपासूनच सकारात्मक दृष्टीकोन ठेवून कामाला लागल्याचे चव्हाण यांनी यावेळी सांगितले.
