ममुराबाद, प्रतिनिधी : जळगाव–ममुराबाद–विदगाव–किनगाव–इंदोर रस्त्यावरील विविध अनियमिततांबाबत नागरिकांकडून सातत्याने आवाज उठविला जात असताना ममुराबाद गावातील अपूर्ण काँक्रीटीकरणाचा प्रश्न ऐरणीवर आला आहे. गावातील रस्त्याचे काँक्रीटीकरण एकाच बाजूने करण्यात आले असून दुसरी बाजू अद्यापही अपूर्ण अवस्थेत आहे. त्यामुळे संबंधित ठिकाणी अडीच ते तीन फूट खोलीचा फरक निर्माण झाल्याने नागरिकांमध्ये चिंतेचे वातावरण आहे.
पावसाळा अगदी तोंडावर आला असताना प्रशासनाने या गंभीर समस्येकडे अद्याप गांभीर्याने लक्ष दिले नसल्याची खंत ग्रामस्थ व्यक्त करीत आहेत. गावातील रस्त्याच्या एका बाजूचे काँक्रीटीकरण पूर्ण झाल्यानंतर दुसऱ्या बाजूचे काम रखडल्यामुळे पावसाचे पाणी निचरा होण्यासाठी आवश्यक व्यवस्था उपलब्ध नसल्याचे नागरिकांचे म्हणणे आहे.
स्थानिकांच्या मते, जोरदार पाऊस झाल्यास रस्त्यावरील पाणी साचून राहण्याची शक्यता असून त्यामुळे वाहतुकीस मोठ्या प्रमाणात अडथळा निर्माण होऊ शकतो. विशेषतः शालेय विद्यार्थी, ज्येष्ठ नागरिक, दुचाकीस्वार तसेच आपत्कालीन सेवांना याचा फटका बसू शकतो. पाणी साचल्यामुळे रस्त्याचे अधिक नुकसान होण्याची देखील शक्यता नाकारता येत नाही.
ग्रामस्थांचे म्हणणे आहे की, विकासकामे करताना काम पूर्ण होईपर्यंत त्याचे योग्य नियोजन व देखरेख होणे आवश्यक असते. मात्र ममुराबादमध्ये अपूर्ण अवस्थेत ठेवण्यात आलेल्या कामामुळे नागरिकांना संभाव्य संकटाचा सामना करावा लागू शकतो. त्यामुळे संबंधित विभागाने केवळ कागदोपत्री कामाचा आढावा न घेता प्रत्यक्ष स्थळ पाहणी करून परिस्थितीची गंभीर दखल घेणे आवश्यक आहे.
यापूर्वीही या रस्त्यावरील विविध त्रुटी, साईड पट्ट्यांवर टाकण्यात आलेली काळी माती, पाण्याच्या निचऱ्याची अपुरी व्यवस्था, तसेच गावातील रस्त्याची कमी झालेली रुंदी याबाबत प्रश्न उपस्थित करण्यात आले आहेत. अशा परिस्थितीत ममुराबादमधील अपूर्ण काँक्रीटीकरणाचा मुद्दा देखील नागरिकांच्या चिंतेत भर टाकणारा ठरत आहे.
दरम्यान, पावसाळ्यापूर्वी गावातील उर्वरित बाजूचे काँक्रीटीकरण तातडीने पूर्ण करावे, पाण्याच्या निचऱ्याची योग्य व्यवस्था करावी आणि भविष्यात वाहतुकीस कोणताही अडथळा निर्माण होणार नाही याची खात्री प्रशासनाने द्यावी, अशी जोरदार मागणी ग्रामस्थांकडून करण्यात येत आहे.
“प्रशासनाला जाग केव्हा येणार?” असा सवाल आता नागरिकांकडून उपस्थित केला जात असून पावसाळ्यापूर्वी आवश्यक उपाययोजना केल्या जातात की नाही याकडे संपूर्ण परिसराचे लक्ष लागले आहे.
