चोपडा – तालुका विधानसभा मतदारसंघ हा सन २००९ पासून अनुसूचित जमाती (एसटी) साठी राखीव करण्यात आलेला आहे. कारण ह्या मतदारसंघात आदिवासीबहुल लोकसंख्येपैकी ७० टक्के लोकसंख्या व मतदारसंख्या एकट्या कोळी जमातीची आहे. परंतु अजूनही येथील आदिवासी कोळी जमातीला टोकरेकोळी (एसटी) चे जातप्रमाणपत्र मिळविण्यासाठी शासनदरबारी भटकंती करावी लागत आहे.
संबंधित विभागातर्फे कोळी जमातीवर हेतुपुरस्संर अन्याय केला जात आहे. यापुर्वी अमळनेर प्रांत कार्यालयाकडुन तसे शेकडों दाखले दिलेले आहेत. मग आता का देण्यात येत नाहित ? हा प्रश्नही सध्या एैरणीवर आहे. याप्रसंगी कोळी जमातीच्या न्याय व हक्कांच्या मागण्या पुढीलप्रमाणे असतील.
१) चोपडा (अ.ज.) विधानसभा मतदारसंघातील ज्या कोळी लोकांचे जातप्रमाणपत्रासाठीचे अर्ज संबंधित विभागाकडे प्रलंबित असतील त्यांना तात्काळ टोकरेकोळी (एसटी) चे दाखले मिळाले पाहिजेत.
२) आदिवासी विकास प्रकल्प यावल अंतर्गत येणारी कोळ्यांची गावे व त्याव्यतिरिक्त इतरही ज्या कोळी गावात ठक्करबाप्पा योजना व शबरी घरकुल योजना राबवली असेल अशा गावातील कोळी लोकांना टोकरेकोळी (एसटी) चे दाखले मिळावेत.
३) ज्या कोळी लोकांची ग्रा.पं. कुटुंब पत्रकात अनु. जमाती अशी नोंद आहे त्यांना टोकरेकोळी (एसटी) चे दाखले मिळाले पाहिजेत.
४) कोळी समाजातील ज्या मुलामुलींची शालेय लि.स.रजिष्टरवर टोकरेकोळी अशी नोंद आहे त्यांना “महाराजस्व अभियान / शासन आपल्या दारी” अंतर्गत टोकरेकोळी (एसटी) चे दाखले मिळाले पाहिजेत.
५) महसूल विभागाच्या ७अ व ७/१२ खाते उताऱ्यावर ज्या कोळी लोकांची आदिवासी ३६ व ३६ अ ची नोंद आहे त्यांना टोकरेकोळी (एसटी) चा दाखला मिळाला पाहिजे.
६) अजूनही ज्या कोळी लोकांच्या जमिनीवर आदिवासी ३६ व ३६ अ ची नोंद झालेली नाही त्यांच्या ७ अ व ७/१२ खातेउताऱ्यावर तशी नोंद होऊन त्यांनाही टोकरेकोळी (एसटी) चे दाखले मिळाले पाहिजेत.
७) यापुढेही फक्त कोळी नोंद असलेल्या दोन-चार पुराव्यांच्या आधारावरच कोळी लोकांना टोकरेकोळी (एसटी) चा दाखला मिळाला पाहिजे.
८) याआधी ज्या कोळी लोकांना प्रांत कार्यालयाकडून टोकरेकोळी (एसटी) चा दाखला दिला असेल त्यांना तो दाखला केंद्रीय (सी) फॉर्म मध्ये वर्ग करून मिळावा, तसेच त्यांच्या परिवारातील इतरही सदस्यांना त्याच दाखल्याच्या आधारावर टोकरेकोळी (एसटी) चे दाखले मिळावेत.
वरिलप्रमाणे न्याय व हक्कांच्या मागण्यांसाठी कोळी लोकांतर्फे आदिवासी दिन व क्रांती दिनानिमीत्त दि. ९ ऑगस्ट २०२३ (वार- बुधवार) रोजी स.११ वाजेपासुन मागण्या मान्य होईपर्यंत चोपडा प्रांत कार्यालयासमोर तीव्र अन्नत्याग सत्याग्रह/ ठिय्या आंदोलन / लाक्षणीक उपोषण/ धरणे आंदोलन/ जेलभरो आंदोलन करण्यात येणार आहे.याची सर्वस्वी जबाबदारी संबंधित विभागाची असेल.आदिवासी कोळी लोकांनी जास्तीतजास्त संख्येने ह्या सत्याग्रहात व ठिय्या आंदोलनात सहभागी व्हावे, असे आवाहन चोपडा म.वाल्मिकी समाज मंडळातर्फे तालुकासंपर्कप्रमुख जगन्नाथ बाविस्कर यांनी ह्या पत्रकान्वये केलेले आहे.
