जळगाव | प्रतिनिधी
जळगाव शहरातील शनिपेठ पोलीस ठाण्याच्या हद्दीत अवैध व्यवसायांच्या वाढत्या तक्रारींमुळे पोलीस प्रशासनाच्या कार्यक्षमतेवर प्रश्न उपस्थित होऊ लागले आहेत. सट्टा-जुगार, अवैध दारूविक्री, प्रवासी वाहतूक, गोवंश वाहतूक व मांसविक्री अशा विविध प्रकारच्या अवैध व्यवसायांबाबत वारंवार तक्रारी होत असतानाही अपेक्षित कारवाई होत नसल्याची नाराजी नागरिकांकडून व्यक्त केली जात आहे. त्यातच काही पोलीस कर्मचाऱ्यांकडून कथित वसुली होत असल्याच्या चर्चेने या प्रकरणाला आणखी गंभीर वळण मिळाले आहे.
शनिपेठ पोलीस ठाण्याच्या हद्दीतील अवैध धंद्यांबाबत निर्माण झालेल्या तक्रारींच्या पार्श्वभूमीवर पोलीस निरीक्षक विशाल जयस्वाल यांची नियंत्रण कक्षात बदली करण्यात आली. वरिष्ठ अधिकाऱ्यांवर प्रशासकीय कारवाई झाली असली, तरी या संपूर्ण प्रकरणात चर्चेत असलेल्या संबंधित कर्मचाऱ्यांच्या भूमिकेची चौकशी होणार का, हा महत्त्वाचा प्रश्न उपस्थित होत आहे.
अवैध धंदे सुरूच, कारवाईचा धाक कुठे?
शनिपेठ पोलीस ठाण्याच्या हद्दीतील काही भागांमध्ये सट्टा-जुगार, अवैध दारूविक्री, विनापरवाना प्रवासी वाहतूक तसेच गोवंशाशी संबंधित अवैध व्यवसाय सुरू असल्याच्या तक्रारी समोर येत आहेत. या व्यवसायांवर नियमित आणि प्रभावी कारवाई होत नसल्याची नागरिकांची तक्रार आहे. अवैध व्यवसाय करणाऱ्यांवर कायद्याचा धाक निर्माण होण्याऐवजी काही ठिकाणी हे प्रकार सुरूच असल्याचे चित्र असल्याची चर्चा आहे.
कथित ‘पठाणी वसुली’च्या चर्चेने व्यापारी त्रस्त?
अवैध धंद्यांवर कारवाई करण्याची जबाबदारी असलेल्या यंत्रणेतील काही कर्मचाऱ्यांकडून दुकानदार व व्यावसायिकांना कथितरीत्या पैशांसाठी त्रास दिला जात असल्याची चर्चा परिसरात सुरू आहे. या प्रकाराला काहीजण ‘पठाणी वसुली’ असे संबोधत आहेत. मात्र, या आरोपांची अद्याप अधिकृत पुष्टी झालेली नाही. त्यामुळे संबंधित व्यापाऱ्यांच्या तक्रारींची नोंद घेऊन स्वतंत्र आणि निष्पक्ष चौकशी होणे आवश्यक आहे.
वरिष्ठ अधिकाऱ्यांची बदली; कर्मचाऱ्यांची चौकशी कधी?
पोलीस निरीक्षकांची नियंत्रण कक्षात बदली झाल्यानंतर संबंधित पोलीस ठाण्यातील कर्मचाऱ्यांच्या कामकाजाचीही तपासणी होणार का, असा सवाल उपस्थित होत आहे. अवैध व्यवसायांचे जाळे उभे राहण्यासाठी स्थानिक पातळीवर कोणाचे दुर्लक्ष किंवा कथित पाठबळ आहे का, याचा शोध घेणे गरजेचे आहे. केवळ वरिष्ठ अधिकाऱ्यांवर प्रशासकीय कारवाई करून संपूर्ण प्रश्न सुटणार नाही. संबंधित बीट कर्मचारी, गस्त पथक आणि जबाबदार अधिकाऱ्यांच्या भूमिकेचीही तपासणी होणे आवश्यक आहे.
शनिपेठ परिसरात बोगस डॉक्टरविरोधात कारवाई झालेल्या एका प्रकरणानंतरही पोलीस कर्मचाऱ्याला नियमित हप्ता दिला जात असल्याचा आरोप संबंधित संशयिताने केल्याची चर्चा होती. तसेच अवैध गोवंश वाहतूक आणि मांसविक्रीबाबत वारंवार तक्रारी होत असल्याचे सांगितले जाते. या प्रकरणांमध्ये नेमकी वस्तुस्थिती काय आहे, कोणत्या तक्रारी प्राप्त झाल्या आणि त्यावर कोणती कारवाई करण्यात आली, याची अधिकृत माहिती समोर येणे आवश्यक आहे.
वरिष्ठ पोलीस प्रशासनाने लक्ष घालण्याची गरज
शनिपेठ पोलीस ठाण्याच्या हद्दीतील अवैध धंदे आणि कथित वसुलीच्या चर्चेची वरिष्ठ पोलीस अधिकाऱ्यांनी गांभीर्याने दखल घेणे गरजेचे आहे. संबंधित तक्रारींची गोपनीय व निष्पक्ष चौकशी करून दोषी आढळणाऱ्या अधिकारी किंवा कर्मचाऱ्यांवर नियमानुसार कठोर कारवाई करावी. व्यापाऱ्यांना निर्भयपणे व्यवसाय करता यावा आणि नागरिकांचा पोलीस प्रशासनावरील विश्वास कायम राहावा, यासाठी पारदर्शक कारवाई होणे आवश्यक आहे.
आता खरा प्रश्न एकच — अवैध धंद्यांना आळा घालण्यासाठी वरिष्ठांची बदली झाली; मग कथित वसुलीच्या आरोपांची निष्पक्ष चौकशी करून संबंधित कर्मचाऱ्यांपर्यंत कारवाईचा फास कधी पोहोचणार?
