धरणगाव (जि. जळगाव) | दि. २५ मार्च २०२६
झुरखेडा येथील लोकनियुक्त सरपंच तथा शेतकरी नेते सुरेशआप्पा गो. पाटील यांनी छत्रपती शिवाजी महाराज शेतकरी सन्मान योजना–२०१७ अंतर्गत शासन निर्णयाची अंमलबजावणी होत नसल्याच्या निषेधार्थ दि. १४ एप्रिल २०२६ पासून आमरण उपोषण सुरू करण्याचा इशारा दिला आहे. हे उपोषण झुरखेडा शिवारातील त्यांच्या स्वतःच्या गट क्रमांक ७६/३ या शेतात होणार असल्याचे त्यांनी जाहीर केले आहे.
या संदर्भात पाटील यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा पवार, सहकार मंत्री बाबासाहेब पाटील तसेच सहकार विभागाचे प्रधान सचिव प्रवीण दराडे (भा.प्र.से.) यांना लेखी निवेदन देऊन परिस्थितीची माहिती दिली आहे.
शासन आदेशाचे पालन न झाल्याचा आरोप
पाटील यांच्या मते, महाराष्ट्र शासनाने दि. १३ मार्च २०१८ रोजी काढलेल्या शासन निर्णयानुसार, छत्रपती शिवाजी महाराज शेतकरी सन्मान योजना–२०१७ अंतर्गत पात्र शेतकऱ्यांच्या थकीत कर्जावर दि. १ ऑगस्ट २०१७ पासून लाभ मिळेपर्यंत कोणतेही व्याज आकारू नये असे स्पष्ट निर्देश आहेत.
मात्र, जळगाव जिल्हा मध्यवर्ती सहकारी बँक यांनी या आदेशाचे पालन न करता शेतकऱ्यांकडून व्याज आकारणी सुरूच ठेवली असल्याचा गंभीर आरोप त्यांनी केला आहे. यामुळे शेतकऱ्यांना मोठा आर्थिक फटका बसत असून अनेकांना कर्जबाजारीपणाला सामोरे जावे लागत आहे.
सहा वर्षांपासून पाठपुरावा, तरीही कार्यवाही शून्य
या प्रकरणी पाटील यांनी २०१९ पासून विविध स्तरावर पाठपुरावा केला आहे. विभागीय सहनिबंधक, जिल्हा उपनिबंधक तसेच मंत्रालय स्तरावर अनेक पत्रव्यवहार करण्यात आले. तसेच उच्च न्यायालयाच्या औरंगाबाद खंडपीठात दाखल याचिकेचा संदर्भ देत त्यांनी न्यायालयीन प्रक्रियेबाबतही माहिती मागितली होती.
मात्र, गेल्या सहा वर्षांपासून कोणतीही ठोस कार्यवाही झालेली नसून शेतकऱ्यांना दिलासा मिळालेला नाही, अशी खंत त्यांनी व्यक्त केली आहे. याशिवाय, अनेक शेतकऱ्यांना मागील काही वर्षांपासून पीककर्जही मिळत नसल्याने शेती व्यवसायावर गंभीर परिणाम होत असल्याचे त्यांनी नमूद केले.
“आता मेलो तरी चालेल, पण माघार नाही” – पाटील
प्रशासनाने वारंवार दुर्लक्ष केल्यामुळेच हे टोकाचे पाऊल उचलत असल्याचे सांगत पाटील म्हणाले,
“सरकारने आता देखील लक्ष दिले नाही, तर मी १४ एप्रिलपासून माझ्याच शेतात आमरण उपोषण सुरू करणार आहे. आता मेलो तरी चालेल, पण माघार नाही.”
प्रशासनाचे लक्ष वेधले जाणार?
झुरखेडा परिसरातील शेतकऱ्यांमध्ये या निर्णयामुळे मोठी चर्चा सुरू झाली असून, शासन आणि सहकार विभागाने तातडीने लक्ष देऊन योग्य तो निर्णय घ्यावा, अशी मागणी स्थानिक शेतकरी करत आहेत.
पाटील यांच्या आमरण उपोषणाच्या घोषणेमुळे प्रशासनावर दबाव वाढण्याची शक्यता असून, येत्या काही दिवसांत याबाबत काय भूमिका घेतली जाते, याकडे सर्वांचे लक्ष लागले आहे.
